ആര്യനാട് ഗ്രാമപഞ്ചായത്തിലെ ശ്യാമപ്രസാദ് മുഖര്‍ജി നാഷണല്‍ റര്‍ബന്‍ മിഷന്‍ പദ്ധതിയില്‍ ഉള്‍പ്പെടുത്തി നടപ്പിലാക്കുന്ന തേവിയാരുകുന്ന് വാട്ടർ സപ്ലൈ പ്രോജക്ട് എന്ന പദ്ധതിയുടെ നടത്തിപ്പിന് നിലവില്‍ വഴിയുടെ തടസ്സമുളളത് യോഗം ചര്‍ച്ച ചെയ്തു. ടി പദ്ധതി നടപ്പിലാക്കുന്നതിന് ഏറ്റെടുത്തിരിക്കുന്നത് കരമനയാറിനോട് ചേര്‍ന്നുളള പുറമ്പോക്ക് സ്ഥലമാണ്. ഫോറസ്റ്റിന്‍‍റെ ഫീസിബിളിറ്റി സര്‍ട്ടിഫിക്കറ്റ് വാങ്ങിയാണ് പ്രസ്തുത പദ്ധതി നടപ്പിലാക്കുന്നത്. പദ്ധതിയില്‍ ഉള്‍പ്പെടുത്തി പമ്പ് ഹൌസും കിണറും നിര്‍മ്മിക്കുന്നതിനുളള പ്രാരംഭ പ്രവര്‍ത്തികള്‍ നടന്നു വരുന്നു. പ്രസ്തുത സൈറ്റിലേയ്ക്ക് മെറ്റീരിയല്‍സ് കൊണ്ടു പോകുന്നതിന് നിലവില്‍ വഴിയുടെ തടസ്സമുണ്ട്. തേവിയാരുകുന്ന് ആദിവാസി ഊരില്‍ നിന്നും കരമനയാറ്റിന്‍റെ കടവിലേയ്ക്ക് പോകുന്നതിന് 2005-ലെ വനാവകാശ നിയമപ്രകാരം ആദിവാസികള്‍ക്ക് കൈവശാവകാശ രേഖ കൊടുക്കുന്നതുമായി ബന്ധപ്പെട്ട് 2009-ല്‍ ഭൂമി സര്‍വ്വെ നടത്തിയപ്പോള്‍ തേവിയാരുകുന്ന് ആദിവാസി ഊരില്‍ നിന്നും കരമനയാറ്റിന്‍റെ കടവിലേയ്ക്ക് പോകുന്നതിന് റോഡിന് വേണ്ടി സ്ഥലം അളന്നിട്ടുണ്ട്. എന്നാല്‍ നിലവില്‍ ടി സ്ഥലം സമീപവാസികള്‍ കയ്യേറി കൈവശം വെച്ചിരിക്കുകയാണ്. ആയതിനാല്‍ ആര്യനാട് ഗ്രാമപഞ്ചായത്തിലെ ആദിവാസി സെറ്റില്‍മെന്‍റുകളായ പുളിനിന്നകാല, മഞ്ചാടിനിന്നവിള, ആനകയത്തുമ്മൂല, പിണറുംമൂട്, മേലേപിണറുംമൂട്, തേവിയാരുകുന്ന്, കാരോട്ടുകാവ്, പന്നിക്കാല എന്നിവിടങ്ങളിലെ മുഴുവന്‍ ആദിവാസി കുടുംബങ്ങള്‍ക്കും സമീപവാര്‍ഡുകളിലെ ആയിരക്കണക്കിന് കുടുംബങ്ങള്‍ക്കും പ്രയോജനം ലഭിക്കുന്ന ടി പദ്ധതി നടപ്പിലാക്കുന്നതിന് പ്രസ്തുത സൈറ്റിലേയ്ക്ക് പോകുന്നതിന് നിലവില്‍ ഉണ്ടായിരുന്ന പൊതു വഴി തുറന്ന് ഗതാഗത യോഗ്യമാക്കി നല്‍കുന്നതിനുളള നടപടി അടിയന്തിരമായി സ്വീകരിയ്ക്കണമെന്ന് ബന്ധപ്പെട്ട അധികരികളോട് അഭ്യര്‍ത്ഥിച്ച് തീരുമാനിച്ചു.